दाङ । दाङको गढवा गाउँपालिका-४ अजगढवामा जुकाको औषधि घाँटीमा अड्किएर १८ महिने बालिकाको मृत्यु भएको छ । गढवा-४ अजगढवाका शिवकुमार यादवकी छोरी जमुना यादवको मृत्यु भएको इलाका प्रहरी कार्यालय गढवाका प्रहरी निरीक्षक डबलबहादुर बमले जानकारी दिए ।
उनका अनुसार कात्तिक २० र २१ गते राष्ट्रव्यापी रूपमा सञ्चालन भएको भिटामिन ‘ए’ र जुकाको औषधि वितरण कार्यक्रमअन्तर्गत बिहीबार गढवा-४ रामनगरमा औषधि खुवाउने क्रममा बालिकाको घाँटीमा औषधि अड्किएको थियो। औषधि अड्किएपछि सास रोकिँदा केही मिनेटमै बालिकाको घटनास्थलमै मृत्यु भएको प्रहरीले जनाएको छ।
प्रारम्भिक अनुसन्धान जारी रहेकाले घटना तत्काल सार्वजनिक नगरिएको प्रहरीले जनाएको छ। महिला स्वास्थ्य स्वयंसेविकाद्वारा खुवाइएको औषधि घाँटीमा अड्किएपछि बालिकालाई श्वासप्रश्वासमा समस्या उत्पन्न भएको प्रहरीको भनाइ छ।
प्रहरी निरीक्षक बमका अनुसार, बालिकाको शव राप्ती स्वास्थ्य विज्ञान प्रतिष्ठान, घोराहीमा पोस्टमार्टम गराई परिवारलाई बुझाइएको छ। उनका अनुसार ‘पोस्टमार्टम रिपोर्ट’ आएपछि घटनाको थप खुलासा हुने छ।
उनीहरूले भिटामिन ‘ए’ र जुकाको औषधि वितरण गर्दा थप सावधानी अपनाउनुपर्नेमा जोड दिएका छन्।
