काठमाडौं– भारतको बिहार विधानसभा चुनावको मत गणना आज हुँदैछ। नोभेम्बर ६ र ११ मा सम्पन्न भएको निर्वाचनको मतगणना आज बिहान ८ बजेदेखि सुरु हुने भारतीय निर्वाचन आयोगले जनाएको छ।
बिहार विधानसभा चुनावमा २४३ सिटको नतिजा आज घोषणा हुँदैछ। यसपटक मुख्य प्रतिस्पर्धा एनडीए र विपक्षीको महागठबन्धनबीच छ । यसैबीच, जनसुराज पार्टीले पनि आफ्नो बलियो उपस्थितिको दाबी गर्दै आएको छ। बहुमतका लागि कम्तीमा १२२ सिट आवश्यक पर्छ।
एनडीए र महागठबन्धन दुवैले जितको दाबी गरेका छन्। दुवै दलले रेकर्ड मतदाता मतदानमा पनि फरक मत राखेका छन्। एनडीएले यसलाई सुशासनप्रतिको समर्थनका रूपमा लिएको छ भने विपक्षी महागठबन्धनले जनतामा परिवर्तन चाहिएको संकेतका रूपमा हेरेको छ।
जनताले राज्यको सबैभन्दा लामो समयसम्म मुख्यमन्त्री रहेका नीतीश कुमारलाई दोस्रो मौका दिनेछन् वा परिवर्तनको बाटो रोज्नेछन् भन्ने विषय केही समय पछि थाहा पाइने छ ।
